A Casa das Peritas recibe o seu nome do alcume co que eran coñecidas na aldea de Mallas, en Fisterra, as derradeiras habitantes da casa: a viúva e as fillas do perito agrimensor Casto Ínsua, o seu primeiro propietario.
Tras un longo período de abandono, acometeuse unha restauración integral que permitiu habilitar as antigas cortes como espazo múltiple, e o resto do edificio como vivenda e lugar de traballo. Deste xeito, a casa abre as súas portas con proxectos expositivos de carácter puntual, baixo unha fórmula que chamamos galería ocasional.
Ademais, e agora si de maneira permanente, A Casa das Peritas funciona como galería online cunha sólida presenza no mercado internacional da arte contemporánea, a través de plataformas de arte globais.
O espazo conta ademáis con licenza de uso turístico da Xunta de Galicia e é lugar de acollida para accións comunitarias coa arte como motor e residencia artística temporal.
O proxecto está impulsado por Tomás Lijó e Natasha Lelenco e ten outra base de traballo na cidade de Ourense, nas proximidades da estación intermodal.
Que facemos?
Comunidade
Colaboramos con artistas para activar proxectos expositivos e de mediación coa comunidade, promovendo o diálogo interxeracional e a posta en valor do medio e do patrimonio.
Comisariado
Comisariamos proxectos expositivos en colaboración con entidades públicas e privadas e participamos en feiras de arte representando aos nosos artistas.
Residencia artística
Máis de 300 metros cadrados de espazo interior e exterior para traballo, lecer, exhibición e vivenda para desconectar e centrarte nos teus proxectos.
Representación
Seleccionamos artistas solventes que comparten a nosa visión e xestionamos o seu catálogo en plataformas para a súa venta global, negociación, facturación, envío, trámites de exportación, etc.
Galería online
Ofrecemos unha selección coidadosa de obras directamente desde os talleres dos nosos artistas, dirixida a unha audiencia global de coleccionistas cunha atención exquisita ao detalle e ao servizo personalizado.
Dixitalización obra orixinal
O mercado da arte online precisa de dixitalizacións de calidade e con fidelidade á cor orixinal que permita valorar a obra como se a tiveras diante, e non abondan fotógrafos que coñezan as pecularidades desta tarefa tan especializada, polo que ofrecemos, desde Ourense, un servizo asequible de dixitalización de lotes de obra.